इंतजार चौमासा रो,
बिरखा बरसी सांतरी, मुरधर जागी आस ।
कोठा भरसी धान रा, डांगर चरसी घास ।।
हाळी हळड़ा सांभिया, साथै साम्भ्या बीज ।
खेतां ढाणी घालसी, स्यावड़ गई पसीज ।।
ऊंचै धोरै बाजरी, ढळवोँ बीजूं ग्वार ।
बिच्च बिच्च तूंपूं टींढसी, मतीरा मिश्रीदार ।।
ऊंचै धोरै टापरी, साथै रैसी नार ।
दिनड़ै करां हळोतियो, रातां बातां त्यार ।।
काचर काकड़ कीमती, मतीरा मजेदार ।
मोठ मोवणा म्होबला, धान धमाकैदार।।
आभै गाजी बादळी, मुरधर नाच्या मोर ।
जीया जूण खिलखिली, देख घटा घनघोर ।।
आभै चमकी बीजळी, मनड़ै जाग्यो मोह ।
बादळ राजा बरससी, मिटसी पिया बिछोह ।।
छमछम बरसै बादळी, धम धम नाचै मोर ।
धरती माथै रूंखड़ा, घालै घूमर जोर ।।
बादळ ऐड़ा ओसरया, मुरधर करियो वास ।
धरती आली सांतरी, करसां पूरी आस ।।
डेडर जीभां खोल दी, भरिया देख तळाब ।
कोयल वाणी सांचरी, मुरधर उमड़ी आब।।
जै जै राजस्थान
कोई टिप्पणी नहीं:
एक टिप्पणी भेजें