तिसळ'र पड़ग्यो

नेम जी अस्पताळ गया ! माथे में गुमड़ो हूर् यो हो ..
नर्स जांच कर'र पर्ची बणाबा लागी ...पूछ्यो "नाम !"
नेमीचंद ...!
"उमर किती है !" नर्स पूछ्यो !
छब्बीस बरस !
नर्स-- शादी-शुदा हो !
नेम जी बोल्या "नहीं सा .
बा बात कोनी ..,
.
.
.
.
.
.
.
.
.

तिसळ'र पड़ग्यो,जणा लागी !

कुण बेटो कुण बाप।

पीपा पाप न कीजिये, अल्गो रहिये आप,
करनी आपो आप री, कुण बेटो कुण बाप।।

जीव मार हिंसा करे, खातो करे बखान,
पीपा प्रत्यक्ष देखले, थाली माय मसाण।।

गीत त्रिकुटबंध करनीजी रो

सहृदय मित्र पुष्पेंद्रसा जुगतावत अर नरपतसा आशिया रै सुझाव माथै आंशिक संशोधन अर थोड़ीक बधोतरी साथै पाछो आप सैणां री निजर-
गीत त्रिकुटबंध करनीजी रो-गिरधरदान रतनू दासोड़ी
दूहो
विघनगारां मुख बाल़जै,मात मिल़ाजै मीत।
पढियो गिरधर प्रीत सूं,गुणी त्रिकुटबँध गीत।।
गीत -त्रिकुटबंध
इल़ा रूप करनल आजरो
हिवां जनम जय हिंगल़ाज रो
इम कोम किनियां करण ऊजल़,मेह रै महमाय।
अवतार करनल आपरो,
सुध भाग रँग सोयाप रो
सोयाप मुरधर रीत सुरधर
उमँग उरधर भाव भर- भर
कोड तर -तर होड कर-कर
गहक धुनिकर गीत घर-घर
सधर सज नर नार सरभर
गुमर हरदिस गहर मनभर
अमर फणधर उरस ऊतर
उछब अवसर रिधू अवतर
पहर खुशियां पाय।।1
जिथ जगराय जूनी जाल़ियां
तण-तण हींड हींडै टाल़ियां
हरियाल़ियां बिच हरस हिवडो ,रमै जणणी रास।
सज सगत झूल़र सोहणा
मँझ उतर मगरै मोहणा
धर कदम पड़पड़ धमक धड़धड
भिल़ी चड़ -चड़ सकल़ भड़ भड़
अरड़    ऊतर   उरड़   ऊमड़
हँसै हड़हड़ खिलै खड़खड़
वडम समवड़ डाव बड़ चड़
खमा खूबड़ अंब आवड़
सदल़ सुघ्घड़ रमै सड़सड़
अनड़  ऊपर गूंज गड़गड
हरस चहुंदिस हास।।2
खलदल़  कटक धर पर खाल़िया
पुनी रीझ  संतजन  पाल़िया
टाल़ियां ज्यांरा विघन तारां,हेर सिर रख हाथ।
कर कोप अरहर कोपणी
घट पटक शूल़ा  घोपणी
जद प्रगट बाघण कान सिर झट
निपट नटखट तणी तणणट
मरट मेटण क्रोध कटकट
झपट नखड़ां मुरड़ झटपट
दुसट दटपट लेस लटपट
फीस फटफट खँड्यो खटखट
चुरड़ चौसठ पियो चटचट
गजब गटगट त्रिपत घट-घट
बहै थिरचक बात।।3
अवनी प्रवाड़ा अणमापरा
उवै सक्कै कुण गिण आपरा
इम रीझ रंकां दैण अवनी,महर कर महिपाल़।
रिड़माल वीकै रीझणी
धुर थाप जंगल कर धणी
गढ छोड गढपत मान मढपत
प्रतख समरथ राखसी पत
साज सतपथ शरण सुधमत
मांड कथ सथ कही महिपत
हर विपत,दे वर बीसहथ
सगत सुण वत किया श्रीपत
थपत जंगल़ पाट थिरपत
भगत भूपत पाव तो प्रत
नमत नित-नित रह्या नरपत
पीढियां प्रतपाल़।।4
दुनी दिपै धज्ज देसांण री
सदा जोड़ धिन्न सुररांण री
बीकांण री वरियांम बसुधा,निमल़ नवखंड नांम।
मढ दरस करनल मात रा
पह सरस कर परभात रा
आ विमल़ बेकल़ बिछी वल़वल
डगर इणपुल़ सजी दल़बल
सगत सहियल़ मिल़ी महियल़
पूग इल़थल़ समल़ परबल़
धार धाबल़ अमल ऊजल़
पाट भलहल़ चीर पल़पल़
हार गल़ बिच हिंडल़ हल़वल़
रमण मनरल़ राय रँगथल़
धरा पावन धांम।।5
वड्ड बीसहथ झल्ल बांहड़ी
छतर धार लोहड़्ड छांहड़ी
मावड़ी निसदिन रखै मरजी,सुणै गरजी साद।
चढ केवियां थट चूरणी
थंभ जँगल़ रिपुदल़ थूरणी
चख लाल कर चढ जैत पख चट
जुड़ी अणथक क्रोध धख झट
भांज लखदल़ लेय भख भट
डक रगत डकडक पियो दट
थरक कमरू अँतक थक थट
छोड बख निज भगो फक छट
महि अरक तक जँगल़ रख मट
रसा जस धज फरक रजवट
मँडी मा मरजाद।।6
जद-जद डरूं संकट जांमणी
सद सुरराय तूं मो सांमणी
थांमणी अँगुल़ी राय थल़वट ,भाल़ करणी भीर।
हित करण,आफत हारणी
चढ खड़ै नाहर चारणी
चढ मदत चारण हांण हारण
भांय भारण आ उतारण
तरण तारण इम उबारण
कुबुद्ध टारण सुबुद्ध कारण
दे उचारण डर विदारण
धरम धारण मन मँझारण
बण उद्धारण ऐण बारण
सकज सारण पथ सुधारण
धरै गिरधर धीर।।5
दूहो
काला आखर करनला,
मन व्हाला कर माय!
गीत कयो कवि गीधियै,
सुण रीझै सुरराय।।
गिरधरदान रतनू दासोड़ी

जणालटक जा

मारवाड़ी पति अपनी पत्नी को मोबाइल पर कंप्यूटर चलाना सीखा रहा था

पति : माय कम्पुटर पर राईट क्लिक कर ।
पत्नी : हाँ कर लियो
पति : फोल्डर खुलियो ?
पत्नी : हां खुलियो ।
पति : अवे ऊपर की तरफ देख कई दिखियो ?
पत्नी : पंखो

पति : चोखो जणालटक जा

खिलौनों

*राजस्थानी भाषा में एक व्यंगात्मक*
                    *हास्य कविता *

कलयुग में भगवान एक, ''खिलौनों बणायो।
दुनियावाला ई को नाम मोबाइल रखवायो।

मोबाइल रखवायो,खिलोणो अजबअनोखो।
धरती क इन्साना न यो,लाग्यो घणो चोखो।।

इन्सानासुं भगवनबोल्या,बात राखज्यो याद।
सोचसमझ वापरो, वरना होज्यासो बर्बाद।।

होज्यासो बर्बाद,चस्को लागेलो अति भारी।
ई के लारे पागल हो जावेली दुनिया सारी।।

सदउपयोग करेजो कोई,काम घणोयो आसी।
दुर्पयोगजे होवण लाग्यो,टाबर बिगड़जासी।।

टाबर बिगड़ जासी,कोई की भी नहीं सुणेला।
'मोबाइल' में मगन रहसी,काम नहीं करेला।।

टाबरांकी छोड़ो,बडोड़ा की अक्कल जासी।
कामधंधा छोड़ बैठ्या मोबाइल मचकासी।

मोबाइलमचकासी और खेलसी दिनभरगेम।
व्हाट्सएप रे मैसेज मे ही,बीत जासी टेम।।

छोरियां और लुगायां लेसी इंटरनेट कनेक्शन।
हाथांमें मोबाइल रखणो बणजावेलो फ़ैसन।।

बण जावेलो फ़ैसन,ए तो फेसबुक चलासी।
रामायण और भगवतगीता पढणो भूलजासी

अपणेअपणे मोबाइल मे,रहसी सगळा मस्त।
धर्मकर्म और रिश्तानाता,सबहो जासी ध्वस्त।

हे ! प्रभु थारी आ लीला है घणी अपरम्पार
थें म्हानेबतावो, यो थांरो किस्यो है अवतार'।।

न्याल कर दिया सा

अगर कंप्यूटर सिस्टम मारवाडी में होता तो कम्प्यूटर का "की पैड" या मैसेज के नाम  कुछ इस प्रकार होते :

Welcome :    पधारो सा 
Ok:     ठीक सा

Send:   गयो परो

Download:  आ गियो सा ☺

Delete:      चूले म जा

Search:    कठीने मरियो

Run:       दोडो

Syntax Error:  अबे की नइ हु सके

Ctrl+Alt+Del: सबरो पापो कटीयो

Thanks: न्याल कर दिया सा

Maharaja Jaswant Singh Ji II of Marwar Maharaja of Jodhpur

Maharaja Jaswant Singh Ji II of Marwar
Maharaja of Jodhpur (b. 1838 r. 1873 - 1895)

The reign of Jaswant Singh II was marked with remarkable prosperity and reforms and development works. He established Courts of Justice, introduced system of revenue settlement and re-organizing all the state departments.Further, he developed infrastructure of the state by introducing telegraphs, railways (Jodhpur State Railway), and developing roads. He formed Imperial Service Cavalry Crops, which later rendered active service in European War. He was honored and created the Knight Grand Commander of the Most Exalted Order of the Star of India in 1875.

The Jaswant Thada is an architectural landmark located in Jodhpur. It is a white marble memorial built by Maharaja Sardar Singhji in 1899 in memory of Maharaja Jaswant Singhji II.

छुपेडो

एक मारवाड़ी न रेड लाइट क्रॉस करता थका पकड लियो....
पुलिस वालो : क्यू थने लाल बत्ती दिखी कोनी के ??
मारवाड़ी :- बत्ती तो दिखी थी पर तू कठे छुपेडो हो ? ❓

अड़ियो दिल्ली आंगणै

अड़ियो दिल्ली आंगणै-

गिरधरदान रतनू दासोड़ी
मरट धार उर मांय, मन डर आगो मेलियो।
चित आजादी चाय,जूझ्यो धर कज जोरड़ो!!1
उरां मरण अणबीह,रहियो रेणव रातदिन।
सोदो जंगल़ सींह, जबर गाजियो जोरड़ो।।2
अँगरेजां सूं आय,अड़ियो दिल्ली आंगणै।
घट होरडिंग घाय,जबर कीनो जोरड़ै।।3
दूजा तो दिनरात,सुख सैजां सूता सदा।
परतख नाहर पात,जूझ्यो फिरँगां जोरड़ो।।4
नह लीनी सुख नींद,दुख  भारत रो देखनै।
बणियो सोदो बींद,जूझ मरण कज.जोरड़ो।।5
बिखमी वेल़ा वीर,भम जँगल़ां में भटकियो।
धुर नह छोड्यो धीर,जूझ मरण कज जोरड़ै।।6
सहिया हद संताप भूख तिरस साजी भल़ै।
अडरपणै धिन आप, जो नहीं मुड़ियो जोरड़ो।।7
भाखर ओटां भाल़़,रहियो कव चढ रूंखड़ां।
कटक गोरां रो काल़,जबरो बणियो जोरड़ो।।7
विदग किसन रै बाल़, जनम्यो जद तूं जोरवर।
थिर  जस वाल़ा थाल़,जबरा बाज्या जोरड़ा।।8
उर अजर आपाण,कव वजर रो काल़जो।
गोरां सूं घमसाण,जद तूं लड़ियो जोरड़ा।।9
लेस नहीं लायोह,आल़स पिंड में आपरै।
जग किसनै जायोह,जूझण गोरां जोरड़ा।।10
जग सह अंजस जात,मातभोम अँजसै मनां।
रे थारोड़ी रात,जनम्यो तुंही जोरड़ा।।11
शहीद सिरोमणी जोरावरसिंहजी बारहठ नैं सादर वंदन साथै श्रद्धांजलि
गिरधरदान रतनू दासोड़ी

शीश बोरलो, नासा मे नथड़ी

शीश बोरलो,नासा मे नथड़ी,सौगड़ सोनो सेर कठै,
कठै पौमचो मरवण रौ, बोहतर कळियां घेर कठै!!

कठै पदमणी पूंगळ री ढोलो जैसलमैर कठै,
कठै चून्दड़ी जयपुर री साफौ सांगानेर कठै !!

गिणता गिणता रेखा घिसगी पीव मिलन की रीस कठै,
ओठिड़ा सू ठगियौड़़ी बी पणिहारी की टीस कठै!!

विरहण रातां तारा गिणती सावण आवण कौल कठै,
सपने में भी साजन दीसे सास बहू का बोल कठै!!

छैल भवंरजी ढौला मारू कुरजा़ मूमल गीत कठै,
रूड़ा राजस्थान बता वा थारी रूड़ी रीत कठै!!

हरी चून्दड़ी तारा जड़िया मरूधर धर की छटा कठै,
धौरां धरती रूप सौवणौ काळी कळायण घटा कठै!

राखी पूनम रेशम धागे भाई बहन को हेत कठै,
मौठ बाज़रा सू लदियौड़ा आसौजा का खैत कठै!

आधी रात तक होती हथाई माघ पौष का शीत कठै,
सुख दुःख में सब साथ रैवता बा मिनखा की प्रीत कठै!

जन्मया पैला होती सगाई बा वचना की परतीत कठै,
गाँव गौरवे गाया बैठी दूध दही नौनीत कठै!

दादा को करजौ पोतो झैले बा मिनखा की नीत कठै
रूड़ा राजस्थान बता वा थारी रूड़ी रीत कठै! !

काळ पड़िया कौठार खोलता दानी साहूकार कठै
सड़का ऊपर लाडू गुड़ता गैण्डा की बै हुणकार कठै!

पतियां सागै सुरग जावती बै सतवन्ती नार कठै,
लखी बणजारो टांडौ ढाळै बाळद को वैपार कठै!

धरा धरम पर आँच आवतां मर मिटण री हौड़ कठै
फैरा सू अधबिच उठिया
बे पाबू राठौड़ कठै!!

गळियां में गिरधर ने गावै बीं मीरा का गीत कठै
रूड़ा राजस्थान बता वा थारी रूड़ी रीत कठै!!

बितौड़ा वैभव याद दिरावै रणथम्बौर चितौड़ जठै
राणा कुम्भा रौ विजय स्तम्भ बलि राणा को मौड़ जठै!

हल्दीघाटी में घूमर घालै चैतक चढ्यौ राण जठै
छत्र छँवर छन्गीर झपटियौ बौ झालौ मकवाण कठै!

राणी पदमणी के सागै ही कर सोला सिणगार जठै
सजधज सतीया सुरग जावती मन्त्रा मरण त्यौहार कठै!!

जयमल पत्ता गौरा बादल रै खड़का री तान कठै,
बिन माथा धड़ लड़ता रैती बा रजपूती शान कठै!!

तैज केसरिया पिया कसमा साका सुरगा प्रीत कठै
रूड़ा राजस्थान बता वा थारी रूड़ी रीत कठै!!

निरमोही चित्तौड़ बतावै तीनों सागा साज कठै,
बौहतर बन्द किवाँड़ बतावै ढाई साका आज कठै!

चित्तौड़ दुर्ग को पेलौ पैहरी रावत बागौ बता कठै
राजकँवर को बानौ पैरया पन्नाधाय को गीगो कठै!!

बरछी भाला ढाल कटारी तोप तमाशा छैल कठै,
ऊंटा लै गढ़ में बड़ता चण्डा शक्ता का खैल कठै!

जैता गौपा सुजा चूण्डा चन्द्रसेन सा वीर कठै
हड़बू पाबू रामदेव सा कळजुग में बै पीर कठै!!

कठै गयौ बौ दुरगौ बाबौ श्याम धरम सू प्रीत कठै
रूड़ा राजस्थान बता वा थारी रूड़ी रीत कठै!!

हाथी रौ माथौ छाती झालै बै शक्तावत आज कठै,
दौ दौ मौतों मरबा वाळौ बल्लू चम्पावत आज कठै!!

खिलजी ने सबक सिखावण वाळौ सोनगिरौ विरमदैव कठै
हाथी का झटका करवा वाळौ कल्लो राई मलौत कठै!!

अमर कठै हमीर कठै पृथ्वीराज चौहान कठै
समदर खाण्डौ धोवण वाळौ बौ मर्दानौ मान कठै!!

मौड़ बन्धियोड़ौ सुरजन जूंझै जग जूंझण जूंझार कठै
ऊदिया राणा सू हौड़ करणियौ बौ टौडर दातार कठै!!

जयपुर शहर बसावण वाळा जयसिंह जी सी रणनीत कठै,
रूड़ा राजस्थान बता वा थारी रूड़ी रीत कठै !!
रूडा़ राजस्थान बता वा थारी रूड़ी रीत कठै!!

कविता  किणै ई भेजी ही चोखी लागी भिजवाय रह्यौ हूं ।

गीत त्रिकुटबंध करनीजी रो

गीत त्रिकुटबंध करनीजी रो-गिरधरदान रतनू दासोड़ी
दूहो
विघनगारां मुख बाल़जै,मात मिल़ाजै मीत।
पढियो गिरधर प्रीत सूं,गुणी त्रिकुटबँध गीत।।
गीत -त्रिकुटबंध
महि मुरधरा वड धिनो मंडी
चारणां सदन परगट चंडी
इम कोम किनियां करण ऊजल़,मेह रै महमाय।
अवतार करनल आपरो,
सुध भाग रँग सोयाप रो
सोयाप मुरधर रीत सुरधर
उमँग उरधर भाव भर- भर
कोड तर -तर होड कर-कर
गहक धुनिकर गीत घर-घर
सधर सज नर नार सरभर
गुमर हरदिस गहर मनभर
अमर फणधर उरस ऊतर
उछब अवसर रिधू अवतर
पहर खुशियां पाय।।1
जिथ जगराय जूनी जाल़ियां
तण-तण हींड हींडै टाल़ियां
हरियाल़ियां बिच हरस हिवडो ,रमै जणणी रास।
सज सगत झूल़र सोहणा
मँझ उतर मगरै मोहणा
धर कदम पड़पड़ धमक धड़धड
भिल़ी चड़ -चड़ सकल़ भड़ भड़
अरड़    ऊतर   उरड़   ऊमड़
हँसै हड़हड़ खिलै खड़खड़
वडम समवड़ डाव बड़ चड़
खमा खूबड़ अंब आवड़
सदल़ सुघ्घड़ रमै सड़सड़
अनड़  ऊपर गूंज गड़गड
हिवां चहुंदिस हास।।2
खलदल़  कटक धर पर खाल़िया
पुनी रीझ  संतजन  पाल़िया
टाल़ियां ज्यांरा विघन तारां,हेर सिर रख हाथ।
कर कोप अरहर कोपणी
घट पटक शूल़ा  घोपणी
जद प्रगट बाघण कान सिर झट
निपट नटखट तणी तणणट
मरट मेटण क्रोध कटकट
झपट नखड़ां मुरड़ झटपट
दुसट दटपट लेस लटपट
फीस फटफट खँड्यो खटखट
चुरड़ चौसठ पियो चटचट
गजब गटगट त्रिपत घट-घट
बहै थिरचक बात।।3
अवनी प्रवाड़ा अणमापरा
उवै सक्कै कुण गिण आपरा
इम रीझ रंकां दैण अवनी,महर कर महिपाल़।
रिड़माल वीकै रीझणी
धुर थाप जंगल कर धणी
गढ छोड गढपत मान मढपत
प्रतख समरथ राखसी पत
साज सतपथ शरण सुधमत
मांड कथ सथ कही महिपत
हर विपत,दे वर बीसहथ
सगत सुण वत किया श्रीपत
थपत जंगल़ पाट थिरपत
भगत भूपत पाव तो प्रत
नमत नित-नित रह्या नरपत
पीढियां प्रतपाल़।।4
जद-जद डरूं संकट जांमणी
सद सुरराय तूं मो सांमणी
थांमणी अँगुल़ी राय थल़वट ,भाल़ करणी भीर।
हित करण,आफत हारणी
चढ खड़ै नाहर चारणी
चढ मदत चारण हांण हारण
भांय भारण आ उतारण
तरण तारण इम उबारण
कुबुद्ध टारण सुबुद्ध कारण
दे उचारण डर विदारण
धरम धारण मन मँझारण
बण उद्धारण ऐण बारण
सकज सारण पथ सुधारण
धरै गिरधर धीर।।5
गिरधरदान रतनू दासोड़ी

तेजाजी की विरासत

हमारे आदर्श और लोक देवता वीर तेजाजी महाराज के बारें में कुछ जानकारी शेयर कर रहा हूं।।।
अच्छा लगे तो शेयर जरूर करे

तेजाजी की विरासत
(1) श्री वीर तेजाजी : शेषावतार लक्ष्मण जी
(2) जन्म तिथि : माघ शुक्ला चतुर्दशी, गुरुवार
वि.स. 1130
29 जनवरी 1074 ई.
(3) पिता : श्री ताहडदेव जी (थिरराज) धौलिया
(4) माता : श्रीमती रामकुंवरी
(5) वंश : नाग वंश की धौलिया जाट शाखा
(6) खांप : चौहान
(7) नख : खींची
(8) जन्म स्थल : खरनाल (नागौर)
(9) विवाह : पीले पोतडों में पुष्कर के नाग घाट पर
पुष्कर पूर्णिमा वि.स 1131
(10) पत्नी : पेमल
(11) ससुर : रायमल जी मुहता
(12) ससुर का गौत्र : झांझर जाट
(13) सासु : बोदल दे
(14) सासु का गौत्र : काला जाट
(15) ससुराल : शहर पनेर
(16) भाई : रुपजी, रणजी, गुणजी, महेश जी, नगजी
(17) भाभियाँ : रतनाई, शेरां, रीतां, राजा, माया
(18) बहिन : राजल
(19) बहनोई : नाथाजी सिहाग
(20) बहिन के ससुर : जोरा जी सिहाग
(21) बहिन का ससुराल : तबीजी (अजमेर)
(22) ननिहाल : त्योद व अठ्यासन
(23) नाना : दुल्हण जी सोढी
(24) गुरु : गुसांई जी व मंगलनाथ जी
(25) लाछां की संपत्ति : गौ माताएं
(26) वीरगति की निशानी : मेंमद मौलिया
(27) मेंमद मौलिया वाहक : आसू देवासी
(28) तेजाजी के दुश्मन : सासु बोदल दे व काला गौत्री बालू नाग
(29) तेजाजी का खेत : खाबड खेत (खरनाल)
(30) तेजाजी का तालाब : गैण तालाब (इनाणा व मूडावा के बीच)
(31) तेजाजी का रास्ता : तेजा पथ
(32) घाटा : मोकल घाटा (मालास परबतसर)
(33) नदी : पनेर की नदी
(34) तेजाजी का वचन : सत्यवाद
(35) तेजाजी की मर्यादा : नुगरां की धरती में वासा ना करां
(36) तेजाजी का व्रत : ब्रह्मचर्य
(37) सम्बोधन : सत्यवादी वीर तेजाजी
(38) माता का बोल : तेजा का बोयोडा मोती निपजे
(39) तेजाजी के साक्षी : चांद, सूरज व खेजडी वृक्ष
(40) बासग नाग द्वारा वरदान : काला बाला रोग चिकित्सा, घर घर पूजा
(41) तेजाजी देवता : सर्प विष चिकित्सा, कृषि उपकारक, पशुधन तारक
(42) पेमल का आशीर्वाद : पूजा से बस्ती नगर रोग निवारण
(43) तेजाजी की चिकित्सा पद्धति : गौमूत्र, नीमपत्र, काली मिर्च, देशी गाय का घी, देशी गाय के गोबर के कण्डो की भभूत
(44) तेजाजी का ध्वज : चांद, सूरज, नाग, खेजडी वृक्ष युक्त
(45) तेजाजी का भोग : देशी गाय का कच्चा दूध, नारियल, मिश्री
(46) तेजाजी के जागरण की रात व व्रत : भादवा सुदी नवमी हर वर्ष
(47) तेजाजी का शकुन : जागती जोत
(48) तेजाजी का गीत : गाज्यो गाज्यो जेठ आषाढ
(49) तेजाजी के गीत की प्रथम गायिका : लाछां गुर्जरी
(50) तेजाजी के गीत की पुन: रचना : बींजाराम जोशी
(51) तेजाजी का शिलोका : पूनमचन्द सिखवाल
(52) तेजाजी ख्याल : पं. अम्बालाल
(53) भक्ति : सालिगराम
(54) ईष्ट देव : शंकर भगवान
(55) सेवा : गोमाता
(56) कर्म : गोचारण, कृषि, युवराज पद दायित्व
(57) धर्म : गोरक्षा, न्याय, सत्यवाद
(58) तीर्थ : तीर्थराज पुष्कर
(59) वीरगति स्थल : सुरसुरा (अजमेर)
(60) दाह संस्कार स्थल : सुरसुरा (अजमेर)
(61) पेमल का सती स्थल : सुरसुरा (अजमेर)
(62) घोडी का नाम : लीलण
(63) प्रमुख शस्त्र : भाला
(64) सहअस्त्र शस्त्र : ढाल-तलवार, धनुष बाण
(65) रण संग्राम स्थल : मण्डावरिया पहाडी की तलहटी एवं चांग का लीला खुर न्हाल्सा करणाजी की डांग (पाली)
(66) प्रतिपक्षी : चांग के चीतावंशी मेर मीना
(67) मीना का सरदार : कालिया
(68) तेजाजी के साथी : पाँचू, खेता, जेता
(69) पेमल की सखी : लाछां गुर्जरी (चौहान खाँप)
(70) लाछां का गांव : रंगबाडी का वास पनेर (अजमेर)
(71) लाछां के पति : नन्दू गुर्जर
(72) लाछां की निशानी : लाछां बावडी
(73) वाईट मार्बल की तेजा जी की घोड़ी  ( सूपर हिट )  जालसू नानक (काटेड़ी ) डेगाना
(74) तेजाजी महाराज का परम व अनन्य भक्त : आप और हम..........
।।।
जय तेजाजी।।
आप इस निवेदन को सभी मित्रों तक शेयर अवश्य करें।
धन्यवाद।

$

आपणी संस्कृति

*आपणी संस्कृति*

*मारवाड़ी बोली*
*ब्याँव में ढोली*
*लुगायां रो घुंघट*
*कुवे रो पणघट*
*....................ढूँढता रह जावोला*

*फोफळीया रो साग*
*चूल्हे मायली आग*
*गुवार री फळी*
*मिसरी री डळी*
*....................ढूँढता रह जावोला*

*चाडीये मे बिलोवणो*
*बाखळ में सोवणों*
*गाय भेंस रो धीणो*
*बूक सु पाणी पिणो*
*........................ढूंढता रह जावोला*

*खेजड़ी रा खोखा*
*भींत्यां मे झरोखा*
*ऊँचा ऊँचा धोरा*
*घर घराणे रा छोरा*
*.......................ढूंढता रह जावोला*

*बडेरा री हेली*
*देसी गुड़ री भेली*
*काकडिया मतीरा*
*असली घी रा सीरा*
*........................ढूंढता रह जावोला*

*गाँव मे दाई*
*बिरत रो नाई*
*तलाब मे न्हावणो*
*बैठ कर जिमावणों*
*......................ढूँढता रह जावोला*

*आँख्यां री शरम*
*आपाणों धरम*
*माँ जायो भाई*
*पतिव्रता लुगाई*
*....................ढूँढता रह जावोला*

*टाबरां री सगाई*
*गुवाड़ मे हथाई*
*बेटे री बरात*
*राजस्थानी री जात*
*...................ढूँढता रह जावोला*

*आपणो खुद को गाँव*
*माइतां को नांव*
*परिवार को साथ*
*संस्काrरां की बात*
*..................ढूंढता रह जावोला*

*सबक:- आपणी संस्कृति बचावो*
*रंगीलो राजस्थान - पधारो म्हारे देश*

तेजा गीत

तेजागीत !!
गाज्यो_गाज्यो_जेठ_आषाढ_कँवर_तेजा_रे........
----------------______------------
गाज्यो गाज्यो जेठ अषाढ़ कँवर तेजा रे
लगतो ही गाज्यो श्रावण भादवो
सुतो किशोड़ी नींद कँवर तेजा रे
थारोड़ा साहीना बीजे बाजरो

इतरो तो झूठ मती बोल माता जरणी ए ...
म्हारोड़ा साहीना खेले गोर में माता
म्हारोड़ा साहीना खेले गोर में

कद्का उबा हाळी, हळ खड़े है तेजा रे
नेना नेना टाबर खेले गोर में
तेजा नेना नेना टाबर खेले गोर में

हाळी रे बयोड़ा मूंग बाट निपजे तेजा रे
थारे बयोड़ा मती निपजे
कठे तो पड़ी है म्हारी रास्याँ माता जरणी ए
कठे तो पड्यो है बाजू बिंजणो

कठे तो मह्न्ग्याई मेल्या बोल माता जरणी ए ...
कठे तो पड़ी है हळ्यों री हालडी
कठे तो पड़ी है हळ्यों री हालडी

ठाण में बंध्याँ है बेल्याँ, बाड़ा में हळ हालडी
खूंट्या टंगी है रास्याँ सार ले तेजा
खूंट्या टंगी है रास्याँ सार ले

तड़के उठियो भोर को
हळीयो लीनो हाथ
आंटा वाळो पेर पोतियो
तेजो चाल्यो खेता रे मांय

देवा ने मनाय चाल्या खेता कँवर तेजा रे
सुगन मनावे बेटो जाट को
केरा बिन्ज्यां मूंग जवार कँवर तेजा रे
थोथलिया धोरा में बायो बाजरो

केडो तप्यो तावड़ो गेहरोड़ी भूख लागी हो ...
तेजो भाता री जोवे बाटडी ...
बेल्याँ म्हारा भूखा उबा है बावज मारी ए
कठे तो लगाईं इतरी देर जी

मण पिस्यो मण पोयो कँवर तेजा रे
मण को तो रांद्यो खाटो खिंचडो

आई तेजा ने रीष जी
किनो भाभी पर कोप
भातो पाछो ले जा भावज
तेजो बोल्यो बोल

तोड़ी आई लारती, लाड लड्या देवर रे
नेने ने छोड्यो हिंडे रोवतो
म्हा पर क्यों करो हो रीष देवर म्हारा रे
लावेनी परण्योड़ी बैठी बापके

बेल्याँ छोड़ खेता रे माँही, तेजो घराने चाल्यो जी ...
भावज रा बोल लागा काळजे ...

बेपारा घराने कैंयाँ आयो कँवर तेजा रे ...
कईं रे फाटी ओ हळ री हाळडी बेटा
कईं फाटी रे हळ री हाळडी

भाभी मोह्न्सो बोल्या
रीष करी मन मांय
परणी बैठी बापके
देवर लावे क्यूँ नी जाय

किणु म्हारी करी ही सगाई माता जरणी ए
किण तो परणायो पिळा पोतड़ा माता
किण तो परणायो पिळा पोतड़ा

काका-भाभा करी है सगाई कँवर तेजा रे
भाभोसा परणायो पिळे पोतड़ा

कठे म्हारो ब्याव करायो माता जरणी ए ...
किणसुं हथलेवो म्हारो जोडीयो मा
किणसुं हथलेवो म्हारो जोडीयो

गाँव पनेर रायमल जी मुथासेन रे ...
बेटी पेमल सुं करीयो ब्याव जी थारो
बेटी पेमल सुं करीयो ब्याव जी

माँ बेटा री बाताँ सुणने
भाभी बोल्या आय
परणी ने लावण सुं पेहला
बेनड ने घर लाव

नणदल बाई बैठा सासरे, पीहर री म्हाने आश रे
जावोनी देवर आणे बेन रे
धरम निभावो देवर जावो रांदल रे सासरे
बेनड उडावे काळा कागला

बेल्याँ ने श्रृंगार चाल्याँ, चाल्याँ कँवर तेजा रे ...
बाई राजल रे चाल्या सासरे ...

दोए रातावासा लीना है कँवर तेजा रे ...
तीजी परभाते तेजो पुगीया ...

बीरे री उडीक में
बाई काळा काग उडाय
आणे आयो तेजल वीरो
बाई मन री मन हर्षाय

डावी म्हारी आँख फरुके नणदल बाई ओ
हवळे बोले है काळो कागलो
के तो आवे जामण जायो वीर नणदल बाई ओ
नहीं तो काकोसा आणे आवशी

जोगोजी सी आज पुगा कँवर तेजा रे ...
बाई राजल रे आया सासरे तेजोजी
बाई राजल रे आया सासरे

राम राम सगाँ सगीने किना कँवर तेजा रे
बाई राजल रे आणे आवियो

उग्यो म्हारे सोने केरो सूरज तेजल वीरा ओ
मुखड़ो देख्यो रे म्हारे वीर को

राखडी पूनम री वीरा
भाई मिलन रो जोग
सासरे सुं सिख लेय
चाल्या पिवर की और

राजल आई पिहरिये, वधावो भाभी म्हारी ए
मायड़ मिलवारो घणो कोडजी

आवो आवो राजल बाई, काळजिए री कोर ए
गळे लग जाय म्हारे जीवडी

राजल ने घर लाय पनेरा चाल्याँ कँवर तेजा रे ...
घोड़ी श्रिंगारो बेली चाँव सुं म्हारी
घोड़ी श्रिंगारो बेली चाँव सुं

मोरतियो पूछाय, पछे जावो कँवर तेजा ओ
सुगन मनाय जावो सासरे
लावो थारा वेद ने पुराण जोशी म्हारा हो
जुना जुगाँ रा देखो टिपणा

जोशी देखे टिपणो
माथो ठण्क्यो जाय
काल चोघडियो देखने
चिंता रही रे समाय

मोरतियो पकड़ में कोणी, सिर पर जोखो रामजी
धोळी तो दिखे तेजा देवळी
बोल कड़वा बोल जोशी, करे कँवर ने घात क्यूँ
पाछा आया सुं पटकू जाजरी

नख्ल्या थारी खाल पडावुं सुण जोशी ओ ...
डोड्याँ में टंगावुं थारी खालडी जोशी
डोड्याँ में टंगावुं थारी खालडी

बामण मार्या धरम थारो डिग जावे कँवर तेजा रे ...
अबकी तीजा ने जईजो सासरे तेजा
अबकी तीजा ने जईजो सासरे

शूर ना देखे टिपणा
वार नी देखे शूर
मरणे ने मंगळ गिने
ज्यांरे मुख पर बरसे नूर

हठ मत कर, केहणो मान लोण्या देवर रे
बेन परणादूँ म्हासूं छोटकी
बेन तो परणावो म्हारा बड़ा भाई ने भाभी ए
तेजो कुमायों जासी सासरे

लिलण ने शिणगारो अब हुकम दियो है तेजा रे ...
परभाताँ जाणों है म्हारे सासरे भाई
परभाताँ जाणों रे म्हारे सासरे

तेजा म्हाने माफ़ करा बोली लिलण माथो धूणे ओ
मत ना सिदावो थे तो सासरे
ढळतोडी राताँ में तुतों चाल लिलण म्हारी ए
वेगेरो पोह्चादे म्हाने सासरे

तेजो चाल्यो सासरे
गाँव पणेर की और
सुगन पलावु होवण लागा
कुरलावे है मोर

डेला मांही मीनकी, आडी फिरी कँवर तेजा रे
कन्या मिलगी मारग में रोवती
कांकड़ मांही छाणा चुगती मिलगी दोय लुगायाँ रे
डावे तो कवळे बोली कोचरी

मेहा तारी राताँ मांही चाल्याँ कँवर तेजा रे ...
मन में भरोसो समरो साथ में पिरे रे
मन में भरोसो समरो साथ में

दीज री अधरात पनेरा पुगा कँवर तेजा रे
जाय वनमाळी ने हेलो मारियो
खिड़की बागाँ री थेतो खोलो वनमाळी जी
बारे भींजे है बेटो जाट को

हो कठारा माल री
ने किसियोक थारो गाँव
माळी पूछे बाग़ रो
कांई थारो नाम

कुंच्या म्हारे पास नहीं है सुणलो कँवरा हो
कुंच्या तो ले गयी है पेमल गोरड़ी
आ लो थे तो एक महोर वनमाळी हो
परणी रे घडाजो टीमणो तेवको

खिड़की बागाँ री खोली वनमाळी जी ...
रातवासो लीनो बेटे जाट को ...

घोड़ी तो उजाड्यो बाग़ फिर फिर मुंडा मारे हो ...
नाश करियो रे सारे बाग़ रो ...

करी पुकार पेमल ने जाय
सुणो बाईसा आप
परदेशी आयो बाग़ में
ज्याँरी घोड़ी कियो रे बिगाड़

कीनो सारे बाग़ रो उजाड़ पेमल बाई ए
परदेशी बतावुं घोळी घाडगी
जठसुं जावोनी बागाँ में भावज म्हारी ए
साथे ले जावो जाडो झुलरो

भाभी संग आई सखियाँ आई बागाँ माँई ओ
भाभी संग आई सखियाँ बागाँ रे माँई ओ
आय ने तेजा ने दीनो ओळबो सेहल्याँ  
आय ने तेजा ने दीनो ओळबो

कठे का कहिजो काँई नाम कँवरा थाको जी
किण रे आया ओ सिगरत प्रोमणा
नाम तेजो गाँव खणायो जात ढोल्या म्हारी हो
मुथा रायमल जी रे आयो पाँवणो

सुण तेजे री बात सहेल्याँ
दोडी घराने जाय
पेमल ने सब बात सुनाई
पेमल मन हर्षाय

घणा दिना री आश बाटाँ जोऊं भावज परण्या री
आज तो सोने रे सूरज उगियो
चालो भावज बागाँ मांही, रह्यो नहीं जावे हो
सूरत परण्या री म्हें तो देखश्या

कर सोळा श्रीणगार पेमल चाली बागाँ माहीं हो ..
मन में उमावो गावे मोरियो ...

काया काईं सोवे चुड़लो, हाथांमें हथफूल जी
पतळे कुळचा में कांकण दोरडा
चाले मद री चाल माथे बेवडले रो भार जी
डोकरसुं ठुकरावे गजबण घाघरो

परणे श्याम ने देखवारडी
हरखी मन रे म्हाय
उतावळी पग भरती पेमल
चाली घराने जाय

आया आया रायमलजी री पोळ कँवर तेजा रे
सासु-सुसरा ने मुजरो साधियो
दुआरी करतोड़ी सासु बोली कड़वा बोल रे
किण तो भड़काया चुगता बाछड़ा

काळ री खायोड़ा पाछो गिरजा बोल्या बोल रे ...
चुंगता भिड़काया बाळक बाछड़ा ...

आई ज्यूँही पाछी फिरजा ए लिलण म्हारी हो ...
नुगरा री धरती पर वासो ना कराँ, आपाँ
नुगरा री धरती पर वासो ना कराँ

सासु रा बोल तेजा रे
लागा कळेजे बाण
उण धरती में ना रेवणो
जठे कोनी अपनो मान

करियो है गजब, अन्याय माता जरणी ए
आय परणे ने दीनो ओळबो
केतो म्हारे परणे ने मनाय माता जरणी ए
उबोड़ी नी पियु पाणी आँगणे

सासु केवे माफ़ करिजो, अणजाणे में बोली ओ ...
कोड़ीला जमाई रुस्या ने सरे, म्हारा
कोड़ीला जमाई रुस्या ने सरे

धरती रो तो रंग मांडण म्हें हूँ परण्या म्हारा हो
दोरी रो रंग परण्यो सायबो
थोड़ी कईं जेज करोनी परण्या श्याम हो
परणी री प्रतिज्ञा सायब राख लो

पेमल मानावे पीव ने
मानो म्हारी बात
गोरी री सुण बात तेजोजी
रुकिया सासरे रात

खातिडा री मरीजो, नार पेमल गोरी हो
सारस की जोड़ी में ढोल्यो सांकडो
खातिडा को काईं है दोष सुणजो परण्या हो
बापु घडाया ऊँचा लुंपणा

दोय मना रो मिलणो आज सुणले पेमल गोरी हो ...
नजरां सुं निरखो नी पेमल गोरड़ी, म्हाने
नजरां सुं निरखो नी पेमल गोरड़ी

पौढ जावो सुखभर नींद परण्या म्हारा हो
ओसिणे दे दूँ म्हें चुड़लो बाँह को
अरे चुडलिया में पड़ जाशी, मोच पेमल गोरी हो
काचोड़ा कुणचा में लडको जावशी

चुडले रो है राम रुखाळो
सुणजो पिवजी जात
घणा दिनासुं रात आई है
पिया मिलन री आज

ओळबिया में रात क्यूँ गमावो पेमल गोरी हो
जुठोड़ा जगडा में दिनडो उगशी
महेंदी म्हारे हाथ भर्यो है परण्या सायबा
दागो तो लागे धोळे धोतिए

सेजा सुतो सुखभरी, नींद कँवर तेजा हो ...
जितरे गुजरकी आई रोवती ...

कोई म्हारी सुन्ल्यो पुकार वीरा म्हारा हो
लान्छ्याँ गुजरी रोवे बारणे
गायां आ ले गया है मेणा वीरा म्हारा हो
सुनी तो कर गया म्हारी गोर ने

लान्छां री सुण विनती
बोल्या तेजोजी आय
गुजरी बोली शूर है
तो चड़ो गायां री वार

क्षत्री थारो धरम निभावो कँवर तेजा हो
गोर में अरडावे बाळक बाछड़ा
घर में थारे घोड़ी क्यूँ राखो कँवर तेजा हो
भाल ने तलवार सुं बोज्या क्यूँ मरो

लांछन मती ना लगाए लान्छां गुजरी ए  ...
थारोड़ी गायां रे वारे म्हें चड़ा, लान्छां
थारोड़ी गायां रे वारे म्हें चड़ा

ठूट गयी है आज बात पनेर री ...
शूरो होतो तो चढ़तो वार में, कोई
शूरो होतो तो चढ़तो वार में

लान्छां री सुण विनती
बोल्या तेजोजी आय
गुजरी बोली शूर है
तो चड़ो गायां री वार

क्षत्री थारो धरम निभावो कँवर तेजा हो
गोर में अरडावे बाळक बाछड़ा
घर में थारे घोड़ी क्यूँ राखो कँवर तेजा हो
भाल ने तलवार सुं बोज्या क्यूँ मरो

लांछन मती ना लगाए लान्छां गुजरी ए  ...
थारोड़ी गायां रे वारे म्हें चड़ा, लान्छां
थारोड़ी गायां रे वारे म्हें चड़ा

ठूट गयी है आज बात पनेर री ...
शूरो होतो तो चढ़तो वार में, कोई
शूरो होतो तो चढ़तो वार में

जिण कसाई लिलण अबी
पांचु सश्त्र लिया हाथ
गायां री वारां में चडियो
वीर तेजोजी जाट

दोय घडी डब जावो परण्या साथे चढ़सुं वार में
जघड़े री वेळ्या मैं घोड़ी कामसुं
अरे जघडा री जातत बुरी है, सुणले पेमल गोरी हो
शूरो जोजे ने कायर कांपशी

शूरो एकलो चढ़ गयो वारां में कँवर तेजा रे ... (
उगतडे परभाते तेजो चालियो ...

गाँव पनेर री कांकड़ माथे लाय धधकती ज्वाला रे
बळतोड़ी अग्नि में देख्यो नाग जी
दया तो विचारी शूरे कष्ठ पावे ओ नाग जी
भाल रे फटकारे सुं बारे काडियो

बळती ल्हाय सुं नाग बचायो
जीव दया ने जाण
नाग देवता बोल्या तेजा
कियो गजब अन्याय

म्हारी देहा पर दाग लगायो, जातो स्वर्गाँ म्हाई ए
क्यूँ तो बचायो म्हाने आय ने
लाखिणी थारी जान बचाई, सुण ले वासंग राजा ए
गुण तो नी मान्यो, ओ गुण मानियो

स्वर्गाँ में जातोड़ो आज छुडायो कँवर तेजा रे ...
म्हारे काळजिये उठी जाळ रे ...

जीवन तो बचायो थारो, सुण ले वासंग राजा ए
दांडी छोड़े ने सरको दूर ने
केह्ला सुं हठ जावो दूरां, सुण लो वासंग राजा ओ
लिलण री टापाँ सुं किचर्यो जावशी

गर्व छतो क्यूँ बोले तेजा
कायर थूं मती जाण
गटको एक करूँ मैं थारो
ले लिलण ने साथ

गटके रो काईं करो, गुमान वासंग राजा ए
शूरो पुरो मरणे सुं न डरे
थारी सासु रो श्राप आडो फिरियो कँवर तेजा रे
थाने दंसुन्ला चिट्टू आंगळी

गुजरी री गायां फेरन लावुं वासंग राजा ओ ...
आवुं बम्बी वचनों रे बांधियो, म्हें तो
आवुं बम्बी वचनों रे बांधियो

चाँद सूरज री साख में वचन देवुं वासंग राजा ए
खाँन्ड्या खेजड री देरावुं जामणी
बम्बी आई जूनो वेर चुकावूँ वासंग राजा ए
देवे वचन बेटो जाट को

जेहरी वेरी ने आदर दीनो
शूराँ री पाळी प्रीत
अमर आशीष है नाग री
होशी झघडा में जीत

भाखर घाटी ढाणी चाल्या, चाल्या कँवर तेजा रे
मीणा ललकार्या बेटे जाट के
तेजे री तलवार चमकी, भालो चलियो हाथ में
मेणा पड़िया पगाँ में आय ने

झघडा माँहि जीत करी, चाल्या कँवर तेजा रे ...
गायां घेरे ने चाल्यो देश में, पाछो
गायां घेरे ने चाल्यो देश में

गिण गिण गायां, सँभाळो लान्छां गुजरी ए
गाम री छाया में मेलो बाछड़ा
लाया सारी गायां, लारे रह गयो काणो केरड़ो
सारा रा विनायक लारे छोड़ियो

सुण लान्छां री बात तेजो जी
पाछा गिरिया जाय
लिलण ने अब हुकम दिरायो
पाछी गेले चाल

आई ज्यूँही पाछी गीर जा ए लिलण म्हारी ए
लोहया री तिरसाई लान्छां गुजरी
मीणा ने ललकार्या पाछा, वीर कँवर तेजा रे
मचियो घमसाण रण में जोर को

बाणा सुं शरीर बिन्दिजियो कँवर तेजा रे ...
लोहया सुं केसरियो जामो रंग गयो ...

ओ ले थारो केरड़ो, सँभाळो लान्छां गुजरी ए
सारा म्हें सिरायत थारी दूध को
पेमल काईं भला ही पदारिया जीजा म्हारा ओ
गायां बिण रहती बिलखी गुजरी

आई ज्योंही पाछी फिर जा
लिलण ने बोल्या बोल
वचन निभाणे बम्बी चलश्यां
मती लगाजे जेज

पूरब रे जन्मां रो बेर चुकाणों लिलण म्हारी ए
कोल निभावे बेटो जाट को
नख दे नाग जगावो भोळी नागण ए
धोळ्यो घुमे है बम्बी नाग रे

आयो ज्योंही पाछो, गीर जाजे कँवर तेजा रे
अवतारी कहिजे कुळ में एकलो

वचन निभायो थे तो वीर कँवर तेजा रे ...
जीव तो देवुं में थाने दान में, थारो
जीवन देवुं में थाने दान में

कायर मती जाण म्हाने, डस जा वासंग राजा ए
जेहरी वेरी रे आगे न झुके
म्हें तो म्हारो वचन निभायो वासंग राजा ए
कौल निभावो वासंग देवता

नाग देवता सुण तेजा री
बात में सूर्यो जोश
डंसवा ने तैयार हो गया
मन में करी कर सोच

थारी देहि सुं लोही टपके, सुणले कँवर तेजा रे
घावाँ उपर वासंग न डँसे
के तो म्हारी हथेल्या ने जीभ कंवारी म्हारी ए
कठे भी डस जावो वासंग देवता

धीन धरती, धीन मात-पिता है तेजा थारा .. (२)
धीन धोर्याधर जामो पावियो, थे तो
धीन धोर्याधर जामो पावियो

काळ्यो हो धोळ्या रो बैरी, आज जुगाँ सुं तेजा रे
काळ्यो हार्यो ने धोळ्यो जीतियो
तेजो नहीं थू शूरो है कोई, बात सुण ले म्हारी ए
देवे वरदान वासंग देवता

कुळ रो थुं कुळ देव बणेला
पूजा घर घर म्हायं
हळोतिये ने करे थारी पूजा
पान लागो छड जाय

अमर आशीष आ म्हारी कँवर तेजा रे
जुग में अमर वेला नाम जी
धीन धीन तो शूराँ री जाई, मरूधर जन्मी वीर की
वारी वारी ओ तेजा जाट ने

रणी बनी ने आशु देवाशी, बकरिया चरावे रे ...
तेजे रबारी ने हेलो मारियो ...

अबकी माँहि काम आवे तो भाई जाणु वीरे ए
म्हारोड़ा समचार सासरिये देवजो
जनम जनम रो बेर चुकायो, डसिया वासंग राजा ए
मोळियो पेमल ने करजे पूगतो

शूरवीर तेजा री गाथा
अमर चारों देश म्हांय
शूरा शूरापो जागशी
मारवाड़ रे म्हाय

सासु-सुसरा ने दिजो राम जवार्यां म्हारी ए
देजे पेमल ने मेमल मोळियो
निजरियाँ सुं देखी दिशी कहिदिजे पेमल गोरी ने
घडी पळक रो तेजो पाँवणो

रोवती लिलण ने बोल्या बोल्या कँवर तेजा रे ...
साचोड़ा समचार बोले ने केवजे, लिलण
साचोड़ा समचार बोले ने केवजे

काका भाभा ने कहिजे परणाम हाथ जोड़ म्हारा
भाई भोजाई ने कहिजे नींवणो
बाई राजल ने धीरज, दीजो लिलण म्हारी ए
बेनड़ सुं बिछोड़ो संवरे घालियो

दे भलामण लिलण ने
तेजो बोल्यो बोल
डस ल्यो म्हाने वासंग राजा
थारो पुरो कीनो कौल

जीभड़ल्या डंख, भरो नी वासंग राजा ए
लिलण के ठाणे घालो बेसणो
नाग देवता उपर चडिया, ठाणे घाल्यो बेसणो
झपटो तो मार्यो वासंग देवता

अमरापुर चाल्यो है हंसलो परदेशी बण पाँवणो ...
झड गया फूलडा ने रेह गई वासना ... (

तेजो जेड़ो वीर जायो वा जननी महान है
एडो शूरो दुनिया में न मिले
पाळी पाळी वचना री प्रीत कँवर तेजा रे
जुग में सवायो हो ग्यो भोमियो

अमर नाम तेजोजी जुग में, गावे घर घर गीत जी
मरूधर धरती में हो ग्यो नाम जी ...
बणियो बणियो नागाणा खरनाल मोटो धाम जी
दिवला री ज्योताँ जगमग जागती, तेजोजी रे