Sunday, 29 May 2016

डोडी रै बिन डील

डोडी रै बिन डील

पङया है गोडा पाधरा,बिन डोडा बालम ।
झरती आंख्यां झेपता ,तङफै नवतालंम ।
तङफै नवतालंम,कि आलम छायो ऐङौ ।
आसंग रही न संग,कयो नी जावै कैङो ।
कहे"गिरधर"कविराय-"रै सुणलै राजे राणी ।
डोडी दे दातार,पङी हालत पतळांणी ।।

"डोडा देवो डोकरी,गोडा गया है गिर ।
डील उठंतां डगमगै,झरै नैण झिरमिर ।
झरै नैण झिरमिर,तिमिर दीसै चहूं तरफां ।
आळस छायो अंग,डील बिन डोडां डरपा ।
कहे"गिरधर"कविराय-"मती लो हाय हमारी ।
भळै नी देवां भूल,बोट म्है अब की बारी ।।"

"कोङी कज ना ही करै,डोडी रै बिन डील ।
रोक लगा दी राज री,खरा ज दीना खील ।
खरा ज दीना खील ,पील वरणी तन पङियो ।
दिखतो आंटो डील,लील बिन रण में लङियो ।
कहे"गिरधर"कविराय-जे रोको दारू "राजे" ।
करो जे ऐङो काम,साख थांरी जद साजै ।।"

   जी.डी.बारहठ